Shab-e-Bahaar

 

Mausame-e-Gul Ki Mehekti Khoobsarat Raat Mein

Maah-o-Anjum the Darakshan Daaman-e-Aflak Mein

Raag Chedaa the Hawa ne Barg-o-Gul ke Saaz Mein

Shaakho-o-Patte Jhoomte The Dilnasheen Andaaz Mein 

Noor Afshaan tha Fizaa mein,  Jugnoon ka Qaafilaa

Dhoondta thaa Apni Mazil, Raat ke Zulmaat Mein

The Patinge Raqs-e- Paiham, Noor ki Aaghosh Mein

Tairaan-e-Khush-Nawa Madhosh the Baghaat Mein 

Ja-ba-Ja Thii Raushani, Raunaq thi Kuu-o-kaakh mein

Shor thaa Sadkon pe Baaqi, Bhiid thii Bazaar Mein

Mehfilein Sajne lagi thiin Baadah-Khaaron ke Sabab

Zaahid-o-Aabid Mehav the  Zikr-o-Istighfaar   Mein

Laut Aaye The Musaafir,  Daftaron Se Daar Mein

Saare Chehre Khil Uthe the, Khaana-e-Afraad Mein  

The Parishaan Ahl-e-Irfaan, Kal ki Fikr-o-Amal Mein 

The Qalandar Mast Saare, Apne  Haal-o-Qaal Mein 

The Sukhanvar Munhamiik Ashaar ki Tasniif Mein

Chun Rehe the Rang, Khushboo Raat ki Jaagiir Mein

Kar Rehaa tha ek Musawwar Ahde-e-Nau ka Haal Naqsh

Thii Numyana  Saari  Uljhan  Dhundlii Tasweer Mein

Shab ki Bekal Chandni mein, Main bhi tha Mahv-e-Khiraam

Khush Kalaami  Ho Rehii Thii doston ke Sang Mein 

Mulko-o-Millat ki Kahani, Shikwa Mausam ka bhi Tha 

Thi Sabhi Baatein Zamaan ki,  Shiirnii Guftaar Mein 

Glossary:

Mausam-e-Gul       Weather of Flower            

Maah-o-Anjum Moon and Stars

Darkhshan   Glittering

Daaman-e-Aflaak Sky 

Barg-o-Gul Leaf and Flower 

Shaakh-o-Patte Branch  and Leaves 

Noor Afshaan Illuminating 

Jugnoon Firefly 

Patinge Moths 

Raqs-e- Paiham Constant Dance 

Tairaan-e-Khushnawa Singing Birds 

Raunaq Illuminating 

Kuu-o-Kaakh Street and Edifice 

Baadah-Khaaron Drinkers 

Zaahid-o-Aabid Hermits and Devotees

Zikr-o-Istighfaar  Chanting God’s Prayer and Seeking forgiveness 

Daar         Home

Khaana-e-Afraad House (of the people)

Ahl-e-Irfaan Men of wisdom 

Haal-o-Qaal Religious Ecstasy 

Sukhanvar Poets 

Musawwar Painters 

Ahde-e-Nau New World 

Khush-Kalami Pleasant Conversation

Shikwa Complaint 

Shiirni Sweet

Ghazal

Aqal ki Had se Guzarkar Raah-e-Manzil  Dhoondiye

Raaz-e_Hasti ko Samajhiye, Ilm-o-Irfaan Dhoondiye

Zindagi ki Tez Lehron mein hai Tughiyani Bahut

Pur-Khatar Maujon Se Ladiye Mat Safeena Dhoondiye 

Thaa Nahi  Aasan Kabhi Bhii  Aamiron Se Ikhtilaaf

Hausla Seene mein Rekhiye,Mat Sahaara Dhoondiye

Khud ko, Khud hi kho diyaa Bazaar-e-Nau ki Bheed mein

Jhoot ki Partein Hatakar, Khud mein Khud ko Dhoondiye

Chaandni Raaton ki Madham Raushni ki Chaaon mein

Khush-Taba Logon se Miliye, Shaadmani Dhoondiye

Noore-e-Eimaan se Nahi aata Agar Dil ko Qaraaar 

Dasht-o-Sahra  mein bhatakiye, Haq ke Maani Dhoondiye

Sher Kahne ka Saleeqa  ya Ghazal mein Fikr-o-Fun

Lafz ke Andar utar kar  Soz-o-Naghma Dhoondiye

Glossary:

Raah-e-Manzil               Path to Destination            

Ilm-o-Irfan Knowledge and discernment

Tughiyani    Deluge

Pur-Khatar Full of Danger 

Safeena  Boat

Aamiron Dictator

Khush-Taba Cherful

Noore-e-Eimaan Light of Faith

Dasht-o-Sahra  Forest and Desert 

Soz-o-Naghma Sorrow and Music 

 

Haath ki Lakeerein

Kuch bhi To Nahi Likkha Be-Rang Hatheli mein

Na Zikr hai Fardaa Ka , Na Qissa-e-Maazi Hai  

Na Harf-e-Mataa-e-Dil, Na Ramz-o-Ishaara Hai 

Na Rabt Lakeeron mein,Na Naqsh hi Poora hai

Ek Mard-e-Qalandar ne Sunkar yeh kaha Mujhse

Be-Rabt Lakeeron mein, Hastii  ki Kahani Hai 

Tuu Dast Shanaasi ke Raazon se Nahi Waaqif

Barson se Chalii Aayee, Yeh Reet Puraani Hai 

Taqdeer ki Gardish Ho, Ya Jashn Bahaaron Ka

Khush Haal Zamana Ho, Ya Daur Balaaon Ka 

Irfaan ka Ho Lamha , Ya Waqt  ho Zulmat Ka 

Qudrat ka likha hai Sab, Sab Khel Lakeeron ka

Ai Mard-e-Jahnadeeda,  Ai Saahib-e-Daanai,

Maana ke Raqam  hai Sab, Roz-e-Azal Se Hi

Mera yeh Aqeeda hai  Azaad Hai Har Insaan

Inkaar Khuda se ho, ya Hukm-e-Khudawandi 

Mashiyyat-e-Ezdii par Kaamil hai mera Eiman

Aamal se hoti hai Zulmat mein Ziyan Paida

Taqdeer ki Yeh Gutthi Maana hai Bahut Uuljhi

Khaaki Ki Ravish se hi Har Khair-o-Jazaa Paida 

Glossary:

Hatheli        Palm

Zikr             Description

Fardaa Tomorrow (Future)

Qissa-e-Maazi Stories of Past

Harf-e-Mataa-e-Dil,         Details stored in heart

Ramz-o-Ishaara         Secrets and Indications               

Rabt Relationship

Naqsh Image

Mard-e-Qalandar An ascetic (Faqeer)

Dast Shanaasi Palmistry 

Balaaon Calamities

Irfaan Mystical Experience 

Zulmat Darkness

Mard-e-Jahnadeeda,  An Experienced Man

Saahib-e-Daanai, Man of wisdom

Raqam Written

Roz-e-Azal Eternity 

Hukm-e-Khudawandi Command of God 

Mashiyyat-e-Ezdii God’s will

Kaaamil Complete 

Ziyan Light 

Ravish Manner

Khair-o-Jazaa Good and Reward

Mera Gaon

Shahraahon se Laga,  Sabz Vaadi mein Basa

Mauje-e-Dariya ki Sitamgeer Faseelon Se Ghira

Shorish-e-Waqt ke Besood Sawalon se Judaa

Zeest ke Rang, Fasal ki Khushboo mein Racha

 

Yehi Gaon !!Mere Ajdad ka Maskan tha kabhi

Unke Asbab ki Duniya,Jashn ka Markaz tha kabhi

Isee Dasht-e-Junoon mein mera Bachpan Guzra

Yehi Arz-o-Sama,  Shauq ka Mehwar tha Kabhi

 

Isi Gaon mein  Aabad tha Khushiyon ka Makaan

Sabz-a-Zaaron se Saja,  Surkh KHishton Se Bana

Baam-o-Dar mein tha Guzarte hue Waqton ka Nishan.   

Zard Deewaar se  Mehfooz tha Rishton ka Jahan

 

Ab jo Lauta hoon Isee Bazm-e-Kuhan mein phir se

Badla Badla hai Saman,  Uljha Uljha hai Zaman

Na woh Phoolon ki Mehak hai,Na Rida Belon ki

Eeent Pathar hai Bhara, Gard ka Sehra hai Yehan

 

Na Mulaqat mein Garmi, Na Madaraat hain Baqi

Na Ikhlaas,   Na Ulfat,  Na woh Jazbat hain  Baqi

Aisa bhi Nahi,Rishate-e-Jaan Sab toot Chuke Hain

Milne Se Gila , Na Milne Ki Shikaayat hain  Baqi

 

Ek Hamdam ne Kaha Mujhse yeh Az-Rahe Muhabbat

Aasan  to Nahi,  Talluq ke Taqazon ko Nibhana

Rishton ki Akhuvvat Ka Alam  Jab bhi Uthana

Yaad Rehe, Ek Aag ke Dariya se hai Doob ke  Jaana

 

 

Glossary:

 

Shahraahon                                             Highways                                              

Sabz                                                      Green

Vaadi                                                     Valley

Mauj-e-Dariya                                        Waves of River

Sitamgeer                                              Oppressor

Faseelon                                                Boundaries

Shorish-e-Waqt                                       Challenges of Time

Juda                                                      Separated

Zeest                                                     Life

Fasl                                                      Harvest

Ajdad                                                    Forefathers

Maskan                                                 Abode

Markaz                                                  Centre

Dasht-e-Junoon                                      Desert of Frenzy(In this context, Abode)

Arz-o-Sama                                            Earth and Sky

Mehwar                                                 Axis

Sabz-a-Zaron                                          Meadow

Surkh                                                    Red

Khishton                                                Bricks

Baam-o-Dar                                           Roof and Gate

Zard                                                      Yellow

Bazm-e-Kuhan                                        Old Congregation(In this context, Abode)

Ridaa                                                    Sheet

Madaraat                                               Hospitality

Ikhlaas                                                  great affection, true friendship

Ulfat                                                     Love, Affection

Gila                                                      Lamentation

Az-Raahe                                               By Way Of

Akhuvat                                                 Brotherhood

Alam                                                     Flag

 

Mu'aashara(مُعاشَرہ)

 

Jane kyon yeh lagta hai

Qaid hoon Hisaaron mein

Tarz aur Tamaddun ke

Khardar Taaron mein

 

Mazhabon ka Pehra hai

Maslakon ki Deewarein

Bediyan hain Rasmon ki

Rawayaton ki Zanjeerein

 

Haath bhi Girafta Hai

Tehzeeb ki Salasal mein

Kaat dii Zuban Sach ki

Maslahat ke Maqtal mein

 

 

Sang-o-Khisht rakhe hain

Aqraba ke Haathon mein

Phool Kam hi Khilte hain

Dil ke Reg-Zaaron mein

 

Daayera Ummidon ka

Roz Badhta Jata hai

Dayera Yaqeenon Ka

Roz Ghatta Jaata Hai

 

Fauqiyat ka Jhagda hai

Mulk ke Khudaon mein

Khoon Ki Lakeerein hain

Sarhadon ke seene mein

 

Aarzi  Khudaon  Ne

Zaabte Banaye hain

Zaabte Ke Tesha se 

Phir Lahoo Bahaye hain

 

Is Samaj ka Dhancha

Hamne hi Banaya hai

Ahd-e-Nau ke Rangon se

Hamne hi Sajaya hai

 

Samaj ka Fusoon khana

Ek Andhere Ghar Sa hai

Jhoot aur Taussab Ka

Ek Dhuan sa uthta hai 

 

Glossary:

 

Hisaaron                                                 Fence, Bulwark, castle                                        

Tarz aur Tamaddun                                 Manner and Civilisation

Khardar Kaanton                                     Barbed Wire

Mazhabon                                              Religions

Maslakon                                               Sects

Bediyan                                                 Shackles

Rawayaton                                             Traditions

Girafta                                                  Arrested, Tied

Salasal                                                  Chains, Shackle

Maslehat                                                Check the appropriateness of the situation

Maqtal                                                   Place of Execution

Sang-o-Khisht                                         Stone and Bricks

Aqraba                                                  Relatives

Reg-Zaaron                                            Desert

Daayera                                                Circle

Fauqiyat                                                Superiority        

Sarhadon                                               Borders

Aarzi                                                     Temporary

Zaabte                                                   Regulations

Tesha                                                    Axe

Ahd-e-Nau                                             New Age

Fusoon khana                                         Magic House

Taussab                                                 Bias

Shikast

 

Chand kab hua Rukhsat

Kab Seher ne Dastak dee

Kab Falak ke Parde se

Raushni Nikal Aayee

 

Neemwa Dareeche se

Khushbuon ka ek Jhonka

Mere Band Kamre mein

Jane Kab Utar Aaaya

 

Kal, ki Haar ki Zad se

Aankh meri Bojhal thi

Jism Reza Reza Tha

Neend kaafi Gehri thi

 

Din ke Shor ne Aa kar

Khwab ke Qafas Tode

Neend ki Girah kholi

Yaad ke Rasan kaate

 

Door se Sadaa Aayee

Aaj ek Naya Din Hai

Dekh, ek Naya Sooraj

Aasman mein Raushan hai

 

Khel Phir Shru Hoga

Koi Phir Se Jeete Ga

Koi Khwab Toote Ga

Koi Phir se Hare Ga

 

Zindagi ki Baazi mein

Jeetne ke Tamghe hain

Faatihon ke Qisse hain

Jeet ke Qaseede hain

 

Zindagi Tasalsul Hai

Anginat Tamashon ka

Jeetne ki Saa’t ka

Haarne ke Lamhon ka

 

Jeet  bhi nahi Azli

Haar kab, Sada se hai

Kal ka, Haarne wala

Jeet Bhi to Sakta hai

 

Zeest ki Bisaton par

Chaal Sari Mushkil hai

Ek Yaqeen-e-Kaamil se

Khelna Zaroori Hai  

 

Glossary:

 

Chand                          Moon                                 

Rukhsaat                     Leave, Left (In the context of the poem)       

Sehar                           Morning

Falak                           Sky

Neemwa                      Half Open

Dareeche                     Window

Zad                              Blow, Damage

Jism                             Body

Reza Reza                   Broken, In Pieces

Qafas                           Cage

Rasan                          Rope

Sadaa                          Voice

Baazi                           Game

Tamghe                       Medal

Fatihon                        Conqueror

Qaseede                      Panegyric

Tasalsul                       Continuity

Anginat                       Uncountable

Saa’t                            Moment

Azli                             Eternal, Ever Lasting

Sada                            Always

Zeest                           Life

Bisaton                        Chess Board

Yaqeen-e-Kaamil        Complete Faith