Ghazal

Naved-e-Aamad-e-Yaaan Se Mausam Khuubsurat Hai

Gulon ke Raqs-e-Paiham Ka Nazaara  Khuubsurat Hai

Hayaa, ki Ot se Shokhi Nigahon mein Utar Aayee

Kaha Dheere se Jab Maine, Muhabbat Khuubsurat Hai

Dil-e-Naadan pe Kya Guzri,Jo Usne Haal-e-Jaan Poocha

Adab se keh diya, Pyare, Yeh Duniya Khuubsurat Hai

Hui Muddat Likhe Jisko, Usii Khat Ka Jawab Aaya

Likha Usne Wahi Usmein, Kahani Khubsuurat Hai

Ajab hai kaifiyat Dil ki Na Jaaane Kaisi Uljan Hai                                               

Na Dilkash Ab Rehi Furqat, Na Qurbat Khubsurat Hai 

Kisi Be-noor Zindaan mein Koi Be-Baak Sa Shaaer

Humak ke gaa Reha tha kal Andhera Khuubsurat Hai

Kisi Benaam Manzil ka Safar Pur-KHaar  Raste Se

Kabhi Dushwar Lagta Hai, Kabhi yeh Khubsurat hai

Utho Tausif Dekho Ab, Subah hone ko Aaaye Hai

Gulon ki Makhmali Chadar pe Shabnam Khuubsurat Hai 

Zindagi Ka Safar

Zeest ka Sail-e-Rawaan, Pahuchega Jab Us Mod Par

Jab Khvaab ke Sheeshe se Saara  Aks  Gum Ho Jayega

Lab ki Sab Shola-Fashani, Dil kaa Sab Josh-o-Junoon 

Waqt Ke Dhundle Safhon mein Chupke se Kho Jayega  

Sust- Rau Qadmon mein hogaa Bojh Guzre  Saal Kaa

Bazuoon Mein Zor Bhi Kam Kam Bacha Reh Jayega

Jism ke Ajzaa mein Kab Baaqi Rehega  Eitadaal

Dhadkanon ka Ghatta Badhta Silsila Reh Jayega

Haan Faraaghat to Rehegi Roz-o-Shab mein Waqt  Ki                   

Milne Waalon ki Kamii Se Dil Bujhaa Reh Jaayega

Hogi Maana Sab Suhulat, Honge Khidmatgaar Bhii 

Guftaguu Karne ko Shayad Chaaragar Reh Jaayega 

Yaad ki Dahleez par  Guzre Dinon Ka  Kaarvan

Kuch Dinon tak to Rahega, Phir Judaa Ho  Jayega

Jab Karoge Zindagi ke Beete Lamhon Ka Hisaab 

Waqt ki Barabadiyon ka Phir Yaqeen Ho Jaayega 

Zindagi ke Is Safar kii Kya Shikayat, Kya Gilaa

Raah mein Kaante na ho, to kya maza Reh Jayega 

Yeh Anaa ke Taaj-o-Zevar, Yeh Takabbur ka Mahal

Jab Safar yeh Khatm hoga, Kya Bacha Reh Jayegi 

Glossary :

Zeest Life

Saile-e-Ravaan Flowing Stream  

Lab `        Lips

Shola-Fashaani Fiery Speeches  

Sust -Rau Slow moving 

Ajzaa Elements 

Eitadaal Balance 

Faraghat         Availability 

Roz-o-Shab Day and Night 

Khidmatgaar Support Staff

Charagar Doctor

Gilaa Complaint 

Anaa Ego

Takabbur         Haughtiness