Mu'aashara(مُعاشَرہ)

 

Jane kyon yeh lagta hai

Qaid hoon Hisaaron mein

Tarz aur Tamaddun ke

Khardar Taaron mein

 

Mazhabon ka Pehra hai

Maslakon ki Deewarein

Bediyan hain Rasmon ki

Rawayaton ki Zanjeerein

 

Haath bhi Girafta Hai

Tehzeeb ki Salasal mein

Kaat dii Zuban Sach ki

Maslahat ke Maqtal mein

 

 

Sang-o-Khisht rakhe hain

Aqraba ke Haathon mein

Phool Kam hi Khilte hain

Dil ke Reg-Zaaron mein

 

Daayera Ummidon ka

Roz Badhta Jata hai

Dayera Yaqeenon Ka

Roz Ghatta Jaata Hai

 

Fauqiyat ka Jhagda hai

Mulk ke Khudaon mein

Khoon Ki Lakeerein hain

Sarhadon ke seene mein

 

Aarzi  Khudaon  Ne

Zaabte Banaye hain

Zaabte Ke Tesha se 

Phir Lahoo Bahaye hain

 

Is Samaj ka Dhancha

Hamne hi Banaya hai

Ahd-e-Nau ke Rangon se

Hamne hi Sajaya hai

 

Samaj ka Fusoon khana

Ek Andhere Ghar Sa hai

Jhoot aur Taussab Ka

Ek Dhuan sa uthta hai 

 

Glossary:

 

Hisaaron                                                 Fence, Bulwark, castle                                        

Tarz aur Tamaddun                                 Manner and Civilisation

Khardar Kaanton                                     Barbed Wire

Mazhabon                                              Religions

Maslakon                                               Sects

Bediyan                                                 Shackles

Rawayaton                                             Traditions

Girafta                                                  Arrested, Tied

Salasal                                                  Chains, Shackle

Maslehat                                                Check the appropriateness of the situation

Maqtal                                                   Place of Execution

Sang-o-Khisht                                         Stone and Bricks

Aqraba                                                  Relatives

Reg-Zaaron                                            Desert

Daayera                                                Circle

Fauqiyat                                                Superiority        

Sarhadon                                               Borders

Aarzi                                                     Temporary

Zaabte                                                   Regulations

Tesha                                                    Axe

Ahd-e-Nau                                             New Age

Fusoon khana                                         Magic House

Taussab                                                 Bias

Shikast

 

Chand kab hua Rukhsat

Kab Seher ne Dastak dee

Kab Falak ke Parde se

Raushni Nikal Aayee

 

Neemwa Dareeche se

Khushbuon ka ek Jhonka

Mere Band Kamre mein

Jane Kab Utar Aaaya

 

Kal, ki Haar ki Zad se

Aankh meri Bojhal thi

Jism Reza Reza Tha

Neend kaafi Gehri thi

 

Din ke Shor ne Aa kar

Khwab ke Qafas Tode

Neend ki Girah kholi

Yaad ke Rasan kaate

 

Door se Sadaa Aayee

Aaj ek Naya Din Hai

Dekh, ek Naya Sooraj

Aasman mein Raushan hai

 

Khel Phir Shru Hoga

Koi Phir Se Jeete Ga

Koi Khwab Toote Ga

Koi Phir se Hare Ga

 

Zindagi ki Baazi mein

Jeetne ke Tamghe hain

Faatihon ke Qisse hain

Jeet ke Qaseede hain

 

Zindagi Tasalsul Hai

Anginat Tamashon ka

Jeetne ki Saa’t ka

Haarne ke Lamhon ka

 

Jeet  bhi nahi Azli

Haar kab, Sada se hai

Kal ka, Haarne wala

Jeet Bhi to Sakta hai

 

Zeest ki Bisaton par

Chaal Sari Mushkil hai

Ek Yaqeen-e-Kaamil se

Khelna Zaroori Hai  

 

Glossary:

 

Chand                          Moon                                 

Rukhsaat                     Leave, Left (In the context of the poem)       

Sehar                           Morning

Falak                           Sky

Neemwa                      Half Open

Dareeche                     Window

Zad                              Blow, Damage

Jism                             Body

Reza Reza                   Broken, In Pieces

Qafas                           Cage

Rasan                          Rope

Sadaa                          Voice

Baazi                           Game

Tamghe                       Medal

Fatihon                        Conqueror

Qaseede                      Panegyric

Tasalsul                       Continuity

Anginat                       Uncountable

Saa’t                            Moment

Azli                             Eternal, Ever Lasting

Sada                            Always

Zeest                           Life

Bisaton                        Chess Board

Yaqeen-e-Kaamil        Complete Faith

 

Shah-e-waqt ke Mureedon ke Naam

 

Ai Sitam ke Saudayee

Jabiron Ke Shaidayee

Nafraton mein Parvarda

Zulm ke Tamashayee

 

Jane kis Adawat mein

Kiski Rasm-e-Ulfat mein

Kis Khuda Ki Marzi se

Kis Nabi ki Chahat mein

 

Bastiyan Jalate ho

Roshni Bujhate ho

Dil mein qaid Khwabon ko

Khak mein Milate ho

 

Be-Zarar Ghareebon ka

Garm KHuun Bahate ho

Aahni Slebon par

Daar-o-Sar Sajate ho

 

Babasi ke Manzar ka

Jashn bhi Manate ho

Qatilon ki Raahon mein

Phool Bhi Bichate ho

 

“Am’n mera Mazhab hai”

Geet Roz Gaate ho

Dilkharash Cheekhon ko

Bhool Kaise Jaate ho?

 

Sochta hoon main Aksar

Gar Milo Kabhi Mujhse  

Jhoot ki Girah Kholoon

Harf-e-Haq kahoon Tumse

 

Nafraton ki yeh Bijli

Aashiyan Jalayegi

Dost aur Dushman mein

Farq kar na Payegi

 

Yaad

Bekaran Shab ke  Saile- Ravaan mein,

Khamoshi  ki Allahr Maujein,

Ahl-e-Qalam ke Bekal Dil Se

Chupke Chupke Mahv-e-Sukhan hain

 

Fikr  ke Gahre Siyah Bhavvar mein,

Yaadon ki ek Sarkash kashti

Beete Lamhon Ke Sahil Par

Dhoond rehi hai koi Basti

 

Ilm-o-Adab ki Dilkash Basti           

Jismein Khwab Buna Karte the

Jismein Sham Saja kart thi

Jismein Dost Reha karte the

 

Basti ki woh Raushan Raatein

Yaad hai Mujhko Sari Baatein

Jaaron ki woh Mahfil-e-Yaraan

Shab bhar jisme hoti Baatein

 

Aql-o-Khirad ki Gehri Baatein

Shahr-e-Tarab ki Pyari Baatein

Armanon ki, Khwab ki Baatein

Sayyad aur Iqbal ki Baatein

 

Yaaron ki is Bazm se Aaye

Kitne Mausam beet Chuke Hain

Jane, mere Dost kahan Hain

Talluq sare toot Chuke Hain

 

Jee, mein Aata hai ke Poochoon

Gar,  Mil Jayein Dost Purane

Basti Yaad Kabhi Aati Hai?

Jis mein the Sab Yaar Purane

 

Haal kahoon kya Shahr ka Apne

Sab kuch Badla Badla sa Hai

Milne wale Khoob hain lekin

Unmein Koi  Dost nahi Hai

 

 

Glossary:

 

Be-karaan                    Boundless              

Sail-e-Ravaaan           Flow/Flux

Ahl-e-Qalam               Writer/Author

Mahv-e-Sukhan          Engaged in Conversation

Siyah                           Black/Dark   

Bhanvar                      Whirlpool

Sarkash                       Rebellious/Obstinate

Sahil                            Sea Shore

Shab                            Night

Aql-o-Khirad              Reason and Rationality

Shahr-e-Tarab             City of Happiness (Basti in this context)

Sayyad                        Sir Syed Ahmad Khan

Iqbal                            Allama Iqbal

Bazm                           Gathering/Party

Mausam                      Season(Time Period in this context)

Shahr                           City (place where I live in this context)

Inquilab

 

Jaur-o-Zulm Ki Shiddat

Khvah, Kitni Badh jaye

Aahni Salakhon se 

Raah Saari Ghir Jaye

 

Hausla Bikhar Jaye

Jism-o-Jaan Laraz Jaye

Haq -Shanas Hami bhi

Jabiron se Mil jaye

 

Munsifon ki Tehreerein

Harf Harf Bik Jayein

Adl ka Taraazu Bhi

Zor-o-Zar Se Jhuk Jaye

 

Shah ke Qaseedon ka

Sheikh Zamzama gaye

Ilm ka Mahafiz bhi

Raah se Bhatak Jaye

 

Doston ki Saazish se

Khet Sara Chin Jaye

Zaat ke Fasadon mein

Jism bhi Jhulus Jaye

 

Bebabasi ki Yeh Raatein

Khvah kitni  Lambi Ho

Raat ki Yeh Khamoshi

Khvah Kitni Gehri  Ho

 

Subh ki Azaan Hogi

Roshni Ayan Hogi

Shor Ek Uthega

Zindagi Jawan Hogi

 

Aamiron ki Barbariyat

Khak mein Fana Hogi

Fir.au.n ,Sar-Niguun Hoga

Tareekh Phir Raqam hogi

 

Inquilab Aayega

Ek Nayee Subah Hogi

Hai Yaqeen Mere Hamdam

Haq ki Phir Fatah Hogi

 

 

Glossary (In the Context of Above Poem):

Khvah                         Whether

Aahni                          Made of Iron

Salakhon                     Iron Bars

Haq-Shanas                 One who is acquainted with/aware of  truth

Hami                           One who is helping/Support

Jabiron                        Oppressors /Tyrant

Munsifon                    Judges

Tehrirein                     Writings /Verdicts (here)

Zor-Zar                       Muscle Power and Money Power

Zamzama gaye            Singing /Concert

Ayan                           Visible

Aamiron                      Oppressors /Tyrant    

Khak                           Earth /Soil

Fana                            Annihilation

Fir.au.n                        Pharaoh, a proud and arrogant person

Sar-Niguun                 Vanquished

Fatah                           Victory/Success

Jiyale Log

 

Mukhalfat ka Alam Uthaye

Kisan Sadkon pe Kheem-a-Zan hai

Bula rehi  hain Zameenen Wapas,

Raah,  Ghar Ki bhi Mutazar hai

 

Sard Mausam, Siyah Raatein

Josh Lekin Thama Nahi hai

Sitam ki Shab se Ulajhta Dahqan,

Jaur-o-Dukh se Dara Nahi hai

 

Nikal pada hai Badalne, Aaiin

Haakimon Par Yaqeen Nahin hai

Takhte-Shahi ko bhi Khabar hai

Kisan Yunhi, KHafa Nahi hai

 

Hukum Hai, Baazar-e-Nau Sajao

Gaahakon ki Kami Nahi hai

Qeematon pe Na Jee Jalao

Nafa ka Dariya, Ruka Nahi hai

 

Nizam -e- Nau ko Salam kar lo

Baghawaton mein Fatah Nahi hai

Badshahon se Bughz-o-Keena

O, Nadan Tujh mein Aql Nahi hai?

 

Khauf-o-Dhashat ke is Shahr mein

Sukoon-o-Sul’h ki Sada Nahi hai

Jiyale Logon, Salam Tumko

Azam ka Shola  Bujha nahi hai

 

Taweel hai yeh Jadal Zameen ki

Pasban ki Kami Nahi hai

Jiyale Logon, Salam Tumko

Misaal Iski Bahut Nahi Hai

 

 

Glossary (In the context of above poem):

Alam                             Flag

Kheem-a-Zan               In Camp

Mutazar                        Awaiting

Sitam ki Shab               Night of Oppression

Dahqan.                        Farmer

Jaur                              Violence /Oppression

Aaiin                           Constitution/Law

Bughz-o-Keena           Malice

Sukoon-o-Sul’h.          Tranquilty and Truce

Azam                           Strong Intention

Taweel                         Long

Jadal                            War

Pasban                         Guard /Keeper

 

Ek Khwahish

Nayee khwahish ne Dastak di hai Dil mein

Kitab-e- Zeest likho, Khoon-e-Dil  se

Sawal-e-Shauq  to Mushkil hai Yaarab 

Qalam mein Zor paida ho, Kahan se 

 

Likhoon main kya, Kitab-e-Zindagi mein

Chunoon Kya kya, Hayat-e-Raftagan se

Main, Bachpan ki Gali se Dhoond laoon

Saja doon Lafz se Maasoom Qisse

 

Virasat ki bhi Baatein, Raqm hongi

Yeh, KHuu Tahzeeb ki aayee kahan se?

Urooj-e-Waqt mein logon ki Mehfil,

Zawal aaya to sab Ghayab, Sire se

 

Woh Ghar jismein Guzara hai Ladakpan

Use main Bhool jaaoon, Kis Tarah se

Woh Ustadon ki Shafqat,Woh Maktab ka Tarana

Kutub mein darj hoga Muhabbat ki Qalam se

 

Aligarh ka Zamana, Mujhe hai Yaad ab tak

Mere Khwabon ki Duniya bani hai is ke Dam se

Kitab-e-Zindagi ka, Yeh  Zarriin Baab hoga,

Ibaarat Naqsh hogi, Huroof-e-Qirmizi se

 

Woh Rishton mein Kashakash, ya Ulfat Aqraba se

Haqeeqat hi likhoon main, Dua hai meri  Rab se

Daroon-e-Dil ki Uljhan ya koi Raaz-e-Hamdam

Likhoon main har Waraq ko, Khuloos-e-Bebaha se

 

Khuda se yeh Dua hai, Mujhe  Zor-e-Qalam de

Mujhe Zauq-e-Sukhan de,Mujhe Lafzon ka Fun de

 

 

Glossary :

Zor-e-Qalam : Power to Pen

Kitab-e-Zeest : Book of Life ( Auto biography in this context)

Hayat-e-Raftagan :  Life goneby

Virasat : Heritage

Raqm : Document /Write

KHuu: Behaviour

Urooj-e-Waqt : The time when u r rising in life

Zawal : Fall

Shafqat : Affection

Maktab: School

Kutub: Book

Ibaarat : Passage of Book

Naqsh : Print /Write

Zrriin Baab -  Golden Chapter

Huroof-e-Qirmizi – Red Letter

Kashakash – Struggle/Contention

Ulfat – Love/Affection

Aqraba – Relatives

Daroon-e-Dil- Inner Heart

Khuloos-e-Bebaha – Lot of sincerity

Zauq-e-Sukhan-  capability of writing/expressing