Yeh Kaunsa Farishta Hai

Falak-shigaaf naaron se shaHr goonj uttha hai,

Shor ke ta-aqub mein karwan gurezan hai
Shola-bar hain aankhen, kaarwan ke meeron ki,
Tez, tund aawazein,  jaise jashn jaari hai
 

Karwan se kuch peeche, aalimon  ka ek lashkar,

Cheekh kar ye kehta hai, ‘Ek farishta aaya hai’
Uske paas quwwat hai, uske paas daulat hai,
Taqdeer ko badalne ki tadbeer usko aati hai

Apni aql-o-hikmat se  mulk ko badal dega,

Bhook aur gharibi ko paaon se kuchal dega

Cheen aur America aake sar jhukayenge,

Ma-ashiyat to aasan hai, maashraH badal dega

Ek ajab si dahshat hai, door choti basti mein,

Khamoshi ki aawazein khauf se larazti hain

Raat ki siyah chadar aansuon se bheengi hai,

Kahin kahin andhere mein raushani chamakti hai

Jashn-o-sog ka manzar ek sawal karta hai,

‘Khauf’ aur ‘Farishte’ mein shayad koi rishta hai

Ek taraf chiraghan hai, hai doosri taraf matam,

Yeh kaunsa farishta hai, woh kaunsi qyamat hai

Hairan in sawalon se, main qaafle mein ja pahuncha,

Dekh ke saham uttha, Tasweer unke haaton mein

Yeh shanasa chehra to zulm ka paymaber hai,

Uske qaHr ke qisse qaid hain samaa-aT mein

Raaz khul gaya mujh per us andheri basti ka,

Mufakkiron ki khamoshi, aalimon ki sazish ka                
Kahani qalam walon ki, sarmayadaron ke qaseeda ka,
Jawanan-e-watan ke josh ka, jazbon ka, naaron ka

 

Eid ka Tuhfa

Gham  ke Gahre Kaajal ko ab Poch do Apni Aankhon se,

Khwabon ke Zarrreen Tasht Sajakar, Eid ke Tohfe laya Hoon

Arman ke Zamurrad hain is mein, Hasrat ke Guhar bhi rekhe hain,

Ummid ke Yqooti Heere , kuch Gehne Azm-e-Safar ke bhi

Yeh Maddham Rang Udasi ka Afsha hai Tumhare Chehre per,

Indoho-o-Alam ki Parchayee Raqsan hai Peshani per

Khushiyon ke Damakte Taaron ko main Mutthi mein Bhar laya hoon,

Masoom Hansi in Honton ki, Wapas Dhoond ke laya Hoon

Yeh zulf-e-Parishan Shanon per kuch Uljhi si, kuch Bikhri si,

Bejaan  latein hain Aariz per, Andeshon se Sahmi Sahmi si

Baadal ki Ghtaon se maine tere Gesu ki Siyahi maangi hai,

Mehtab ki Rakhshan Kirnon se, Tab-o-Tadap bhi laaya hoon

Leghzish yeh Tumhare Haathon mein, kisi Fikr ki Saazish hai Shayad,

Hain  Wahm-o-Guman ke Sangon se  Majrooh tumhare  Paeenda Qadam

Hauslon ke Aahni Teeshon ko main Saath mein lekar aaya  hoon,

In Sangon ko Mismaar Karo, in Fikron ko Paemaal  karo

Is Eid pe aao Azm karein, ek aise Jaahan ka nazm karein,

JahaN Tarab ki Baala-dasti ho, Ummid ki har soo khushboo ho

Yaqeen ka Parcham lahraye, Azmon ke Sharare Ithlayein,

Mushkil hai Magar imkaan to hai, is Jahan pe mera Eimaan to hai

Fasl-e- Baaran

Yeh Mausam Janfeza hai, Dil Nasheen hai, Soz-e-Dil bhi hai

Aamad-e-Fasl-e-Baraan se Sarshar hai Raat,

Hai Fizaon mein Sharab-e-Kuhan jaisa Khumar

Qafala-e-Abr bhi aaya aai,  Mast-e-Kheram

Bijliyan Raqsan hain Maanind-e-Sharar

   

Yeh Mausam Janfeza hai, Dil Nasheen hai, Soz-e-Dil bhi hai

                         

Daman-e-Arsh se aati hui Kirnon pe Sawar,

Boondein Barish ki yun Utarti hain

Jaise Motiyon ka Safed Aawezah,

Bikhar gaya hai Sunahre Aanchal mein

Yeh Mausam Janfeza hai, Dil Nasheen hai, Soz-e-Dil bhi hai

                         

Pehli Baarish ke Phuaaron ka Ajab hai yeh Sitam,

Mehhmoor Hawaon ke Behke jaate hain Qadam

Chooke Chup Chap Guzar Jati hai Rukh-e-Janaan ko,

Bheege Chehre pe hai Qaus-e- Qazah ka Aalam

                             

Yeh Mausam Janfeza hai, Dil Nasheen hai, Soz-e-Dil bhi hai

                                                    

Door is Gulistan se ek Kisaan ke Ghar mein,

Barkha aur Birha ke Geet gaye jate hain

Ummeed ki Nayee Konpal, Phir Se Sar Uthati Hai,

Sondhi Geeli Mitti mein Khwab Boe Jate Hain

Yeh Mausam Janfeza hai, Dil Nasheen hai, Soz-e-Dil bhi hai

Jashn-e-Tarab ke Naghmon se pare, Wasi Falak ke Saaye tale,

Ek Quam Basera karti hai, jo Zinda bhi hai, Murda bhi

Badal ki har Aahat par jo Khoon ke Aansoo Roti hai,

Is Aansoon ki kya Qeeemat hai, Afraat bhi hai aur Arzaan bhi

                                 

Yeh Mausam Janfeza hai, Dil Nasheen hai, Soz-e-Dil bhi hai

______________________________________________

Glossary

Fasl-e- Baaran : Rainy Season

Janfeza : Pleasing                  

Dil Nasheen : Enthralling, Something that captivates heart.

Soz-e-Dil : Pain of Heart

Aamad-e-Fasl-e-Baaran : Arrival of rainy season

Sarshar  : Happy

Sharab –e- Kuhan : Old Wine

Khumar : exhilarate or stupefy as if with alcohol, impact of inebriation or consuming alcohol

Qafala-e-Abr : Caravan of clouds

Mast-e-Kheram : Carefree stroll

Raqsan : Dancing

Manind-e-Sharar : Like a Lightening

Daman-e-Arsh: sky

Aawezah : Type of jewellery

Mehhmoor : Inebriated, Drunk

Qaus-e- Qazah : Rainbow

Birha : Separation

Jashn-e-Tarab: Celeberation of Happiness

Wasi Falak : Vast sky

Afraat : Excess

Arzaan : Cheap

Chalo Main Baad-e-Baan Phir khol Deta Hoon Safine ka

Bekaraan Shab ke  Saile- Rawan mein,

Khamoshi  ki Allahr Maujein,

Sahil-e-Waqt ki Deewaron se,

Mahv-e-Sukhan hain, Naala-ba-Lab hain

Tariki ke Siyah Bhanwar mein,

Tooti hui ek Neend ki Kashti

Jal-Thal Chand ki Hamrahi mein,

Dhoond Rehi hai Khwabon ki Basti

Mujh ko Yaqin hai Chand Shab Pehle,

Subh-e-Fardan ke khushboo se Mehki

Khwab-e-Nau ki Bekal Basti,

Sahil se kuch Door, Yehin thi

Hain Shayad Khwab Gurezan Mujhse,

Gosha-e-Dil se Aayee Fughan

Baadal ke Sarkash Tukdon ki Tarah,

Is Pal mein Ayan, Us Pal mein Nehan

Main bhi Haarne wala Kab hoon,

Is Tilism ko Mujhko Todna hoga

Khwab, Matay-e- Jaan hai Mere,

Us Manzil ke Nishan ko Dhoondna hoga

Chalo Phir Baad-e-Ban Maine Khol Deta Hoon Safine Ka,

Ajnabi Samt mein, Tund Hawaon ke Khilaf

Phir Shru hoga Safar, Ek Nayee Umang ke Saath,

Be-Naam Jazeeron ki Taraf, Tadapti Lehron ke Khilaaf

Woh Aakhri Shab

Sard raaton ki pur-shikoh khamoshi,
Ek hamdam ka khaal-o-khad le kar,
Apne daaman mein le ke raaz-e-hayaat,
Shab ke gumnam kharabe se nikal aayee hai

Uski maghmoom adh-khuli aankhein,
Aina hai guzashta barson ka,
Fikr-e-fardan se muzmahil chehre pe,
Hai ayaan karb roothe khwabon ka

Uske saakit labon per hui junbish,
Dik ke barabat se aayee ek nahif sada,
Har soo raushan hai saal-e-nau ke chiragh,
Rakh do tum bhi lab-e-baam ummidon ka diya

Yeh mah-o-saal ki gardish,yeh zameen ka raqs,
In rasoomat-e-jahan se ,gar hai shikayat mujhko,
Yeh  khamoshi to mere zeest ka ek hissa hai,
Us ki baaton ki hifazat bhi rawa hai mujhko

Aao kar lein naya azm, naye saal mein aaj,
Dil ki tareeki ko ummed-e-sehr se farozan kardein,
Aaaj ki raat khwabon ki har ek raah-e-guzar
Apne alfaz ke shamm’on se manuwwar kar dein

Khwabon ke Taaqub mein

Phir se Saaman-e-safar baandh liya hai maine

Apne Khwabon  ke Taaqub mein niklana hai mujhe

Zindagi  ke sehra mein,

Waqt ki garm reiton per,

Ek Sunahri manzil ki

Justaju liye dil mein,

Phir se Saaman-e-safar baandh liya hai maine

Waswason ke toofan mein,

Azm ka alam thame,

Yaqeen ki asa le kar,

Ireteqa ki hasrat mein,

Phir se Saaman-e-safar baandh liya hai maine

Paon aabla-pa hain,

Zehan bhi tazabzub ki,

Aandhiyon mein larzan hai

Sa-oobton se be- parvah

Phir se Saaman-e-safar baandh liya hai maine

Ahbaab se judai bhi,

Aashana fizaon se

Thodi bewafai bhi ,

Husool-e-shauq ki zid mein

Phir se Saaman-e-safar baandh liya hai maine

Taghayyurat ke mausam ki dastak,

Nayee umeed ki mauhoom aahat,

Nayee manzil se aati yeh sadaayein,

Qadam ko aakhirash rokoon main kab tak,

Phir se Saaman-e-safar baandh liya hai maine

Apne Khwabon  ke Taaqub mein niklana hai mujhe

Woh nazm adhoori hai ab tak

Woh nazm  adhoori hai ab tak
Woh nazm  adhoori hai ab tak

Mulaqat ki pehli sham thi shayad,
Jab tum ne kaha  tha , ek nazm likho
Is maut si khamoshi se pare,
Door kahin traeeki se,

Khush-rang  sehr ke baare mein
Taaer ki sheereen sargoshi liye,
Baang-e-Jaras mein doobi hui,
Sarshaar fiza ke baare mein

Us nazm ki dilkash basti mein
Hasti ka sharara raqsan ho
Mehfil-e- yaraan jamti ho
Bazm-e-chiraghan hota ho

Har harf hawa ka jhonka ho,
Har lafz mein ho ehsaas-e-zyan,
Har sher ummedon ka chashma,
Har band se ho afkaar ayaan

Woh nazm  adhoori hai ab tak

Takmeel-e-nazm ki hasrat mein,
Khwabon ke nagar mein jata hoon
Chun Chun ke harf  ke phoolon ko,
Lafzzon ka mahal banata hoon

Phir din ki dastak hoti hai
Khurshid ke biphre sholon mein
Khwabon ka nagar jal jaata hai
Lafzon ka mahal gir jaata hai

Woh nazm  adhoori hai ab tak
Woh nazm  adhoori hai ab tak