Ghazal

 

Maah-o-Anjum ki Justaju Mein Sukuun Dil Ka Ujad Reha Hai

Saa’ton Ko Main Qaid Kar Luun,Yeh Lamha Lamha Guzar Reha Hai

 

Zindagi Ke Naye Taqaaze,  Yeh Shauq-o-Armaan ke Istiaare

Ahd-e-Nau ka Mizaaj Yaaro  Qabaayein Apni Badal Reha hai

 

Khushi ke Afsoon Talash Kartaa, Gali Gali Jo Bhatak Reha Hai

Batao Usko, Khushi Ka Gauhar Darun-e-Dil me Damak Reha Hai

 

Purane Rishton ka Baagh Suuna, Na Koi Nakhat Na Koii Rangat

Dostii ka Shajar  Jhukaa Hai, Barg-o-Gul Bhi Bikhar Reha Hai

 

Rasm-e-Kuhnaa Ki Bediyon ko Tegh-e-Irfaan Se Kaat Daalein 

Ilm-o-Danish  ka leke Parcham  Badho  Zamana Badal Reha Hai

 

Tumhare Aamad ki Ek Khabar Se Dil Ki Vaadi Mahak Uthi Hai

Surkh Phulon Mein Koii Baitha Vafaa Ke Naghme Suna Reha Hai

 

Suna Reha tha Woh Apne Qisse, Shagufta Lahje mein Dheere-Dheere

Zikr Aaya Hai Jabse Mera, Woh Jane Kyon Muskura Reha Hai

 

Karun Khatam Ab Ghazal Main Apni, Raat Shayad Guzar Chuki Hai

Shab ke Aanachal Se Kaun Aakhir Chaand Taare Chura Reha Hai

 

Glossary :

Maah-o-Anjum                Moon and Stars

Sukuun                          Peace

Saa’ton                          Time/Moments

Istiaare                          Metaphors

Qabaayein                     Cloth

Afsoon                           Magic

Gauhar                          Pearl

Darun-e-Dil                   Inside heart

Nakhat                          Fragrance

Shajar                           Tree

Burg-o-Gul                    Leaves and Flowers

Rasm-e-Kuhna                Old Traditions

Teghe—Irfan                  Sword of Wisdom

Ilm-o-Danish                  Knowledge and Sagacity

Parcham                        Flag

Aamad                           Coming

Surkh                            Red

Shagufta                        Interesting /Nicely Said